Dem boys seh...Judge Irizarry going to de thiefing Bees next

Dem boys seh…Judge Irizarry going to de thiefing Bees next

Oct 11, 2012 Dem Boys Seh, Features / Columnists, News

Show me you company and I will tell you who you BE. Dem old people always use to seh suh, especially when dem giving warning to dem young pickney. Ed Ahmad was one of Jagdeo company. He rob, cheat, fraud and steal from dem poor people in America and now he deh in de court crying because he preparing fuh peep through bars fuh a very, very long time. Dem boys dream Judge Irizarry seh suh.
And he end up in front of that same judge wha dem boys love. When Ed guh fuh talk de judge tell he fuh tek he time and think before he put heself in more hot water. She seh that she want an intelligent answer. That is a caring judge. She even tell Ed that not because he name Ed Ahmad that he gun play de last three letter in he name.
De man plead guilty and imagine that he own lawyer tell he that he couldn’t defend he pun that charge wha could send he jail fuh 30 years. But de Americans is great people. Dem don’t tek advantage and dem doing things slowly and in order.
De prosecutor who name Solomon in de court send a message to dem boys. De man tell dem that Uncle Sam does wuk chronologically and alphabetically. Dem start wid A and almost done wid de A. That is A fuh Ahmad. Dem gun tun dem attention to de Bees next. Well dem boys seh that Brazzy deh down de list because dem got Bar Rat, then dem got Barbie and then Boyah. But he time gun come before dem Brians.
And de suit done measure, sew and hang up. Dem boys seh that de people had to alter Brazzy suit a couple times because he getting bigger.
Ed Ahmad rob, cheat, fraud and steal from dem poor people fuh a lang time, from 1995 to 2009. When dem boys do de English dem get 14 years. De lovely judge gun use that same English and get de same answer because she bright just like dem boys.
Talk half and go girl judge.