Dem boys seh...Top Cop saving he soul

Dem boys seh…Top Cop saving he soul

Sep 25, 2012 Dem Boys Seh, Features / Columnists, News

Dem long time teacher use to frighten dem pickney by putting de wild cane pun de table. Dem commissioner who hearing de evidence in de Linden shooting decide fuh put two bible pun de witness stand.
De Top Cop was de first man dem call. He did plan fuh lie but when he butt up de two bibles he come to he senses. He remember two of dem Top Cop dead de other day and all two was lying scamps.
This top cop who tell everybody he is a short man wid a short temper watch dem bible; one was black and one was blue, and he start fuh sweat. One been pun he left and one been pun he right. Every time dem ask he a question he look right and he look left and seh “I can’t lie. I can’t save nobody here”.
He tell heself that he got to save heself and let he brother go astray. In this case he let he ranks guh astray, including Rohee. Today dem commissioner gun add a Bhagvad Gita and de Holy Koran next to dem bibles.
Dem boys seh that Bharrat Ramroop and Barbie Jagdeo and all dem Bees, including Irfaat, should go pun a witness stand, too. Dem lie so much and continue to lie to de nation every day.
Dem boys hope and pray that Uncle Donald set up a special commission fuh investigate. Dem boys done prepare fuh testify and dem gun testify in front of all dem holy book because wha dem got fuh talk is de truth, de whole and nutten bout de truth. So help me Gawd.
Meanwhile, Rohee and de Chicken Commander sweating because de officer who dem plan putting de blame pun done seh that he nah bearing no strain.
De commissioner done let loose and he ah let loose too.
Talk half and listen who gun talk all.