Dem boys seh... Some people ain’t got no shame

Dem boys seh… Some people ain’t got no shame

Jul 16, 2012 Dem Boys Seh, Features / Columnists, News

Other thing does always full people eye. Dem boys talk bout de fancy boat that somebody see and dem decide that dem gun buy one fuh de police suh when dem got to go and sport dem got a boat fuh go up de river. Is a good thing de boat never really wuk because time like now certain Ministers woulda either dead by drowning because dem like drink and do stupidness.
Some police woulda deh in de same boat in more ways than one. Henry de Yellow decide that he wasn’t part of de action and he mek that clear. He seh that he didn’t buy no boat. In any case even if he did buy de boat he couldn’t fit inside. And if he did fit de boat woulda sink.
Dem got other thing that full people eye. All of dem Minister see movie and all of dem want to live like de people in de States. That is why dem full dem pocket and build dem fancy house. One house was suh fancy that Janet Jagan, before she dead, go till to de house and refuse to go inside fuh de opening. She seh that she shame at wha she was seeing.
But if she shame dem got some people ain’t got no shame. Dem boys hear bout a certain man who wukking at Caricom. This man pick up wid a lady and he find out that she got a dollar put up.
This man borrow every day. He borrow fuh help build a house; he borrow fuh buy car and he don’t want pay back. De lady know that she can tell Bar Rat but she also know that he gun want borrow too. She don’t want tell Uncle Donald because he gun bring it up at de Caricom summit.
Dem boys seh that she might go to court because is nuff money. But dem boys seh that she only salvation is to tek de house and de car because de man ain’t gun pay back because he bruck.
Talk half and try fuh find de other half.