Dem Boys Seh... Jagdeo on de run or in hiding?

Dem Boys Seh… Jagdeo on de run or in hiding?

Jul 06, 2012 Dem Boys Seh, Features / Columnists, News

Whenever people hear somebody on de run or in hiding everybody know that is something terrible and shameful dem do. Tek de case of Jagdeo. He was executive president.
In a fight, he was like a soldier wid a AK47 in he hand against a teacher wid a wild cane pun he shoulder.
Nobody can sue he. He was above de law. But not now seeing that he lef office. He did sue Freddie. When he done sue he tell de nation that he will have his day in court. The day in court arrive but no Jagdeo to be seen.
One judge ask fuh him, one call fuh him and another went looking fuh him, but de man couldn’t be found. He couldn’t be seen or hear from. Dem boys seh that according to another judge he had dem lawyer waiting.
Dem lawyer did done chew up an spit out de Lunch man. Dem sharpen dem teeth, dem fingernail, dem toenail and even dem eyeball fuh Jagdeo. Dem lawyers did want mek mince meat out of he. De case close and nobody ever hear from de man. Not even he own liar dem wha he tek couldn’t find he much less get he in de court. He cut good card.
But he was around. Dem boys ketch he hiding in de Santa complex at Ruimveldt. A lot of people want fuh know how long he gun hide. Not even Peeping Tom can find he and he is a see man.
Dem boys tease Jagdeo, almost on a daily basis, hoping he gun sue but like he tun chap sue what Babbie drinking every day since he hear dem people coming back fuh dem money wha dem got hideaway right in de complex.
Dem boys hear quiet that de hag of de money dem buy in raw gold and dem got it tuck away somewhere in de complex. Dem boys also hear that nuff of de perks from de treasury and kickbacks from dem kantractors deh in de same Santa complex.
When dem boys study this thing, dem start fuh think whether Jagdeo really hiding or he sitting down in de Santa complex and watchmanin’ de tons of raw gold dem got deh.
Talk half and you watchman de other half.