Dem boys seh...Ralphie lef and Donald gun get lef

Dem boys seh…Ralphie lef and Donald gun get lef

Jul 03, 2012 Dem Boys Seh, Features / Columnists, News

Dem got nuff Goolsarran in Guyana just like how dem got de Lalls and Harrises. But two of dem Goolsarran is definitely thief. One of dem had runnings wid textbooks and de other had runnings wid couple GT&T man.
De one who was de biggest crook in de textbook scandal had millions pass through he hand and dem boys want to know how come he nah get jail yet.
De other one who like telephone money collect that money and put it in he bank book and claim how he was doing Hen See Hen a favour. Jail gun pick he soon because Uncle Donald seh that he ain’t done wid he yet. Just like how Ralphie ain’t done wid de PPP yet. He seh that he gun go back only if Donald deal wid Jagdeo and dem li’l thiefing kavakamites.
Ralphie re-tiling one of he bathroom and he seh that every tile he turn centipede deh underneath. Same way Donald turning leaf in dem book wha he got pun he desk fuh look at dem deal and he finding thiefing under every page.
Gail, Cement and de Bukta involve. Jagdeo haul dem in just like how he mek he last haul wid de airport deal before he come out. Ralphie seh that dem three is nobody. One use to thief bicycle outside cinema, one get slap from Cheddi fuh collecting ten per cent bribe, this time not from de Chinese. Was fuh contracts to build pontoons.
Gail settle fuh a small piece from Ohh Pee and dem frighten that all this gun come out during de investigation.
Rob Earth, Irfaat and Shaatie and Brazzie, Donald don’t have to do no investigation. In fact, de jail cells clean out and waiting fuh dem.
But dem boys seh that Ralphie lef and if Uncle Donald ain’t act too fast he gun get lef.
Talk half and right de other half.