Dem boys seh...De Waterfalls boss man going into pharmaceuticals

Dem boys seh…De Waterfalls boss man going into pharmaceuticals

Jun 25, 2012 Dem Boys Seh, Features / Columnists, News

Is a TV programme mek dem boys know why dem got all de lawsuits. At first dem boys think was joke. Dem couldn’t believe that Bobby would resort to Plan C to sell he paper. Is when one of he friends talk. And is somebody in Canada tell dem boys.
De Hard Times paper don’t sell although de owners seh that dem increase dem circulation dramatically. De plan is to shutdown de Waterfalls paper. Well dem boys seh that it can’t happen because de people ain’t gun allow it to happen.
Poor Tony give up he TV station and he kicking heself today. He even give away he news team like if dem was property and Bobby capitalize. It ain’t gun be de same wid de Waterfalls paper. De Boss man did promise to sell Bobby de paper but that was before Bobby set up he own.
But de staff was out of de equation. That is why Bobby recruit staff from all dem other news agency. Some from de Waterfalls paper actually go but dem run and come back. De grass look green but it was bitter over deh at de hard times paper.
Now de Waterfalls Boss Man seh that he getting into de pharmaceutical programme and he betting that he gun do better than Bobby, that Bobby gun lose market share.
And dem boys want to know how come de Norway people giving Uncle Donald de money and dem was not giving Bharrat. It had to be a signal. And now that Uncle Donald getting de money dem boys want to know if he gun still quarrel bout budget cuts.
And wha happen wid de probe at Hen See Hen fuh determine who really thief? Martin still on leave and Fuzzy still hoping that things gun blow over.
But dem boys seh that dem intend to keep on de heat because dem got too much thiefing all round.
Talk half. Lef de rest to dem boys.