Dem boys seh...Like dem MP mouth glue down

Dem boys seh…Like dem MP mouth glue down

Jun 10, 2012 Dem Boys Seh, Features / Columnists, News

Dem have a saying ‘Live and let others live. Eat and lef fuh others eat.’ But dem got some people—one name Bernie Madoff, one name Allen Stanford, one name Jagdeo and one name Bobby.
Everybody know wheh de first two end up. Jagdeo and Bobby gun follow dem soon. Dem not only greedy, dem extremely, extremely, extremely greedy.
Dem boys just find out that Bobby medicine company jook out everybody eye wid de price dem charge fuh de drugs wha dem sell de government.
Dem charge six times de retail price in de store fuh de same drug and Jagdeo buy dem wid a smile.
Imagine if this only unearth now, imagine wha dem bin a do from fifteen years to now. How much billion deh in dem pocket. And if people think that is bad and greedy tek de airport one. Jagdeo seh that fuh he to get a $40 million China loan fuh build de airport he have to tek a Chinee contractor. And de Chinee contractor then turn round and tell Jagdeo that airport gun cost US$150 million.
Dem boys seh that scenario, is like going to a bank fuh a loan to build a $15 million house. And de bank tell you that fuh you to get de loan you have to tek de bank contractor. That bank contractor tell you is $50 million fuh build de house wha you want.
Now tell we, which jackass tekking that loan? Who gun fall fuh that if you not getting a big kickback.
And dem boys seh, guess what, all de politicians, except Prakash and Trotman, sitting down and keeping dem mouth shut as if dem a get kickback too. Dem jackass. De nation want dem fuh seh something –maan.
Dem boys seh that if you can’t stand up fuh something you gun fall fuh anything. And that is wha Jagdeo gun give dem.
Talk half. And call pun dem donkeys fuh speak up.