Dem boys seh...NICIL gun send nuff people to jail

Dem boys seh…NICIL gun send nuff people to jail

May 07, 2012 Dem Boys Seh, Features / Columnists, News

Dem have problems all over de place. De other day de people had to close de Harbour Bridge to fix it. People grumble and dem blame de budget cuts. It tek a few days and de bridge fix. Then gas prices go up and dem blame de budget cuts.
Shaatie step in and he cut de tax and de price come down. Then dem had speeches about de budget cuts and how dem gun fix de situation. This time de people who cut de budget explain that dem was actually stopping some people from thiefing money.
Next thing dem boys know de bridge break down again. Well people want to know how much money really cut because it look like if is everything stop wukking. Blackout happening all de time and de power people claim how is de budget cut.
Well dem boys did want to know if de budget was cut all de time when dem same things was happening. But budget or no budget dem boys seh that dem ain’t tekking no distraction. All de talk is a distraction from de money that in NICIL. Nuff money been in NICIL and nobody wasn’t talking about it because de plan was to use it fuh personal projects.
Marriott was one and when dem seh that dem gun spend money pun de Marriott that people decide to check. Dem boys did send a message to Henry de Yellow to investigate but he lef de wuk. Brummel ain’t get de wuk yet suh he biding he time and wid all de focus pun NICIL he ain’t get appointed.
But de net closing in and one of de fuss people who know was Brazzy. He send in he resignation. De rest of dem still toughing it out but as dem boys seh, de longest rope got an end.
Talk half and watch out fuh de other half.