Dem boys seh...Even Kaka Belly got to pay fuh cross under de Berbice Bridge

Dem boys seh…Even Kaka Belly got to pay fuh cross under de Berbice Bridge

Mar 28, 2012 Dem Boys Seh, Features / Columnists, News

It is human nature to own things but some people does want to own everything. De last set showing dem beastly nature and some of dem look like beasts. And if dem ain’t got de size dem gun get it before dem dead in jail wearing de pumpkin jumpsuit.
Some of dem think dem own de Treasury suh dem does tek out money like if dem tekking it from dem pocket. Dem boys believe that some of dem tek so much that dem don’t have room fuh put it.
But dem boys seh that is only de big ones can tek from de treasury suh de rest tekking from everything. Dem private people who own de Berbice Bridge decide that dem gun tek de river. Dem rob de nation wid de Bridge because it is one of de most expensive bridge in de world.
Poor people and dem pickney couldn’t cross de bridge. Dem had to protest and is suh dem get to use de river. But de same private people who own de bridge ain’t satisfy wid wha dem a get. Dem suh greedy that dem now decide that dem gun tek over de Berbice River. Dem start charge people fuh using de river.
That river been deh before Guyana was Guyana. Nobody didn’t own it, not even de Dutch but Geeta and she kavakamites dem who own de bridge decide that de Bridge ain’t giving dem enough money. Dem tekking from even de fish wha swimming near de bridge and under de bridge. Even Kaka Belly got to pay. Ask Brazzy who got a cock up belly.
And talking bout Brazzy, dem boys want tell de nation that de Marriott, is a Public Private Partnership–in simple language, is a PPP hotel. Dem boys want explain in a simple way that everybody could understand. Is like going to de bank, tekking a loan, buying a Mercedes Benz, carry it pun a speedboat and put it on Hogg Island fuh wuk taxi. Hog Island don’t have no road and hardly got people. De project fail before it start.
Talk half and let dem explain de Marriott.