Dem boys seh...De jump suit waiting fuh more people

Dem boys seh…De jump suit waiting fuh more people

Feb 19, 2012 Dem Boys Seh, Features / Columnists, News

De Ali Baba gone and a new Baba come. This one suppose to bring happiness and nuff joy. De whole country get a new one and like any new baba in a home people expect de new baba fuh cry different, fuh laugh, fuh bring a lot of joy.
De new baba does bring family together, it does unite nation. But Ali Baba divide de nation. He even divide he family first then he divide other people family. He encourage dem chore fuh do dem job good and dem really clean up.
De new baba frighten fuh look at de Treasury. Dem now find out that dem chore use to write cheque by de hundreds of millions of dollars and give dem friends. Ali Baba use to write by de billions. He got nuff to de extent that he throwing he money around suh that when people ask he gun claim that is he investment.
Ali Baba did get jail and Guyana Ali Baba gun get more than jail. Right now he got Sunny in New York jumping up like if is he own Easy Jet. He believe that people wouldn’t know that he own de airline.
Wha mek people more sure is when dem see another Kwame at JFK managing de flight operations fuh de EasyJet.
Uncle Donald come pun de scene like de new Baba. He announce that he gun clean up all de thiefing but like he don’t know wheh fuh start. Dem boys don’t believe that he is Ali Baba big brother.
De Auditor General suddenly wake up and find that some people use to write cheque long before dem even sign a contract and then when de time come dem pay de cheque.
One particular chore who is no longer part of de team had a good system according to de Auditor General. He get de Ministry fuh send a cheque then de contractor gun send back a Manager’s cheque which de chore don’t pay back to de coffers.
Is that money dem now using fuh do all kind of things. That is why dem gun wear de orange jump suit.
Talk half. Lef half.