Dem boys seh...Today love gun be expensive

Dem boys seh…Today love gun be expensive

Feb 14, 2012 Dem Boys Seh, Features / Columnists, News

Today is a special day. Rich people like all dem who mek money doing funny things like thiefing gun spend like crazy. Dem is de ones who gun buy some big box of chocolate. Dem is de ones who gun carry dem woman to some fancy place fuh eat and dem is de same ones who gun look fuh rob more people when today pass.
That is why dem had so many robberies over de weekend. Dem had to get money and all of dem seh that if de big ones can thief and don’t get ketch then dem can do de same thing.
Now dem boys seh that de police can solve all dem crimes today. All dem got to do is to check wid dem stores and find out who spend nuff money.
De people at de Waterfalls paper will have a quiet Valentine’s Day. De boss treating all de women to white rice and red meat. Some of dem already place an order fuh rice and lap chong—same red and white. De men gun get salara.
De people at de Cathedral gun be sporting red, too. And dem too gun be expensive.
Valentine’s Day is de one day when Uncle Freddie does get busy looking fuh he friends to buy chocolate. But one man gun have a sad Valentine’s Day. Henry de Yellow regret that he set eyes pun a woman who tek he money and still holler rape.
Last year he fete all de police women and send nice rose fuh dem. This year he keeping far. Even he deputy ain’t having nutten to do wid de women and Valentine.
But is de night when some family gun have a nice time. De poor ones gun buy Chinee food. And dem boys know why all dem restaurant selling expensive food when is de same thing dem cooking fuh less money whole year. Is not de food that people buying. Is de whole Valentine.
Dem boys gun wait and eat home.
Talk half. Lef half.