Dem boys seh...Times change and people too

Dem boys seh…Times change and people too

Jan 29, 2012 Dem Boys Seh, Features / Columnists, News

A man is as good as de people round he. If everybody round he mek he feel like if he is de greatest thing on earth then he gun believe that he is de greatest.
Was a time when a man use to walk like a king. He had guards and people use to run to shake he hand and put thing round he neck. One time dem put something wet and another time dem put something wid ants. This was a powerful man because he use to mek decisions and nobody coulda challenge any.
When this man enter a building people had to stand up and dem could only sit down when he sit down. This was a man who coulda mek one call and people could get lock up or free from jail. That was a powerful man.
If a man powerful he got to be powerful till he dead but in this case de people round de man change. Suddenly de man ain’t powerful no more. But de man always seh that he never want power only fuh help people.
Dem boys seh that once people taste power something does happen to dem and one only got to see who is he friends. This man call de radio station and tell de people to ban de Eddie Hooper song, “Where are your friends now?” All he friends gone away although dem ain’t lef de country.
This was a man who always had sign board up all over de place. All that come down. Dem boys want to see if Uncle Donald gun build a statue to this man. Perhaps Fip gun build two statue when he get de US$12 million from Sithe Global.
That is why dem boys seh is people does mek you great or feel great and dem same people does cut you down.
Talk half. Lef half.