Dem boys seh...This Bee got to lose he contract too

Dem boys seh…This Bee got to lose he contract too

Jan 16, 2012 Dem Boys Seh, Features / Columnists, News

Some people still talking bout de contract dem tek way from Fip. Uncle Donald did meet wid de man and talk to he one month before de contract get tek way. Was a warning. Now dem boys seh that he should meet wid one of de Bees.
This one tek two contract fuh build de stelling fuh de roll-on roll-off ferry. He promise fuh do de wuk in four months. De time come and gone and dem boys ain’t seeing de wuk. Dem bruck down piece of de Parika stelling and dem drive four piles in de four months.
Dem boys seh that it look like if Guyana training acrobats. People gun have to come off de ferry and climb pun de pile. Dem can’t walk though and is a Bee cause that. De last stelling that man mek bruck as soon as dem start fuh use it. Now he ain’t building anything but he tek de money.
When dem boys ask de man wid de hammer wha happening, that dem ain’t see no wuk. He tell dem that de Bee mobilizing. It got to be that he behaving like he name. He stockpiling de money that he tek fuh dem stelling just like how dem bees does stockpile honey.
De nonsense got to stop and dem boys now waiting fuh see if dem gun tek back that contract and seize he performance bond too. Dem should also seize de equipment because he costing de taxpayers. De only thing that happen is that he mek dem speedboat move from wheh dem use to deh.
If he lef wid dem contract, by de time he done de two vessels from China gun rotten. And dem is new boat. De Bee ain’t even got material at de site at Parika. Wuss yet, no wuk ain’t going on at Supenaam. Uncle Donald watching and dem boys seh that is only a matter of time wid this particular Bee.
Talk half. Lef half.