Dem boys seh...Bar Rat applying fuh siren and outrider

Dem boys seh…Bar Rat applying fuh siren and outrider

Jan 12, 2012 Dem Boys Seh, Features / Columnists, News

Nuff files end up pun de road de other day and all of dem come from de Finance Ministry. Was old files but some of dem had important information. Dem boys seh that just as de elections was coming dem notice people running in an out of de Ministry of Finance wid big bag of paper.
Then dem see people tearing up de same paper. Well right away dem boys call de police but de Henry de Yellow tell dem that is no crime fuh anybody fuh walk wid paper and that he got nuff paper in he toilet and when he ready he does put some in he pocket fuh when he going to de office.
De paper couldn’t burn and City Hall got problem wid garbage suh dem throw de paper pun de road. City Hall lef it and Sam lef it. But dem boys seh that some of de paper come from State House and dem was checking to see if anything bout de Santa complex was there.
Dem see an application fuh three car wid siren. Was Bar Rat mek de application. He tell dem boys that he got to drive in de Santa compound and that he got to drive wid he siren on suh de staff gun know that he coming.
De paper also had an application fuh a motorbike because Bar Rat seh that he got to get an outrider. But dem boys want to know if he challenging de Donald. One man tell dem boys that de Donald don’t use he siren suh Bar Rat want use it. He forget that Rohee and Robert like siren too.
And dem boys want to know if he going to Parliament when Donald going. He can be a special invitee but some people feel that he shame because de PPP blaming he fuh de minority government.
And dem boys extend sympathy to Roger Luncheon. De man mother gone home to a place of rest. May de Man above rest her soul.
Talk half. Lef half.