Dem boys seh...People running to hide dem house

Dem boys seh…People running to hide dem house

Jan 05, 2012 Dem Boys Seh, Features / Columnists, News

Shame is a thing that does mek people do strange things. And nuff thing does mek people shame. Irfaat shame when de Waterfalls paper print he house and question how he get it. He friends shame too because dem watch de house and dem feel that he do something funny fuh get de money fuh build de house.
But since de photo is nuff excuse. One man claim that Irfaat mother and father done spoil he and is dem give he de money fuh de house. Another friend claim how he get de money from he great grandfather who was rich.
But is de Lunch Man who put de thing pun de stage. He claim that Irfaat had a silver spoon. That mean that de boy had a small piece.
But is one thing. When story buss out other people who expect fuh get skin up, does call pun friends fuh help. One man claim that he frighten fuh leh people know that he and all got big house fuh just three of dem.
Was a time when people use to show off wid fancy car. De more fancy de car, de more powerful de Minister use to feel. Now dem switch to house. De more fancy de house de more big de Minister big.
But `after de Waterfalls paper skin up Irfaat dem same people now decide that dem got to come up wid something else. Dem can’t walk wid too much gold because is de bandits pun de road.
Some of dem use to eat at fancy place and drink fancy likker. But there is a limit to how much people can eat and drink. That is why dem start fuh show off wid house.
Now de house is a big problem.
Talk half. Lef half.