Dem boys seh...Dem former leaders disappearing

Dem boys seh…Dem former leaders disappearing

Dec 20, 2011 Dem Boys Seh, Features / Columnists, News

Dem boys don’t mek joke when people dead. It got to be that dem frighten suh all was well when Kim Jong ill. Then dem get de news Kim Jong Dead. Right away dem boys know is not a good year fuh leaders. That is why dem can’t understand why people running fuh de wuk.
Apart from all who dead after dem lef de wuk a whole heap of dem dead in de wuk. Gadaffi dead, Mubarak sick, Chavez sick, Lula sick, Castro sick and Saddam get pull from a hole. Dem hang he. That is why dem boys advising all dem crookish people who use to lead to avoid holes. Gadaffi use to live in a hole too and is a hole dem drag he from.
Dem boys seh that dem notice that since Bar Rat lef office he gone in a hole. That ain’t surprising because rat does like hole. Dem big rat does mek a fancy hole wid entrance and exit. Bar Rat got a big hole in Sanata Complex and that place got two exit.
Dem hoping that nobody ain’t got to drag he from one of dem same hole because Prak done talk how he want to mount an investigation and jail all dem rat who thief.
Dem boys notice that one man mekking front page all de time and de story ain’t even got merit. If Chronicle had to buy that same press de money dem pay de Waterfalls boss man couldn’t even pay fuh de assembly. Bar Rat buy a press from India and he know de cost. But in any case money don’t got value to he. He got too much.
Talk half. Lef half.