Dem boys seh...Presidential candidate sleep way

Dem boys seh…Presidential candidate sleep way

Nov 29, 2011 Dem Boys Seh, Features / Columnists, News

Yesterday was voting day in Guyana. People tun out like rice, Dem boys seh that dem know wheh all dem presidential candidate was voting, except one. He was de only presidential candidate who name got not one but two Pee Pee. Up to when elections done he own campaign manager and he office don’t know wheh he vote. No reporter couldn’t find he.
People didn’t see he pun de Waterfalls front page and complain how de paper bias. Dem boys seh that dem search de whole Guyana and couldn’t find he fuh get that front page picture.
Dem boys find out later that he was sleeping. He had no campaign but he tired and he sleep way fuh three day. He wife wake he some time Election afternoon and tell he “Boy, today is election. You nah a guh vote?”
He lef and guh somewhere according to he wife but dem boys see he at de dentist putting in teeth in he mouth. He did order de teeth before. People still want know wheh he vote.
And while he hide Henry de Yellow was praying. Whole day he deh pun he knees praying fuh nutten don’t happen. When night come four man had to lift he up. He couldn’t get up.
But he got to guh down pun he knees again tomorrow. He got fuh beg that everything run smooth. But is not only he praying. De whole country praying. Right now is only thief, police and media people deh pun de road.
Even dem junkies gone into hiding in dem rat hole, not Bar Rat hole. He got a big hole, full of money and gold. Brazzy not ordinary. He got he own hole and that got lots of money too. Nuff of de deal got to pass through he.
Dem boys seh that is thirteen of dem—de Dutty Dozen plus one—de Bar Rat.
Dem boys plan to show how this team own half of Guyana. De Donald tell dem boys suh. He also tell dem boys bout de airport deal.
Somebody done collect US$100 million. Dem didn’t get de hydro money, dem didn’t get de Norway money suh dem tek de airport project secretly. Dem mek sure dem get something heavy as a farewell message—sorry, farewell package to touch de billion dollar mark.
Dem aim fuh de billion, not million, because dem name begin wid B—de Bees. But only one got it in ‘Merican money.
Talk half. Lef half and wait fuh more to come.