Dem boys seh....Hit da road RAT!

Dem boys seh….Hit da road RAT!

Nov 28, 2011 Dem Boys Seh, Features / Columnists, News

Today people going and vote. Nuff of dem voting fuh de first time and some of dem confuse. One man tell dem boys that he decide to vote fuh de party that had de best music in de advertisement. He claim that he don’t know de words but he like de music.
Some people decide fuh vote fuh de party that had de nice women. Well dem boys seh that dem gun have a problem deciding pun that because all dem party had nice women.
But de most interesting thing is that nuff people guh out last night and buy likker because dem hear that all dem rum shop gun close fuh de whole day. Some people even cook up a storm because is a holiday and dem don’t intend to miss out.
But de thing that is de most important is de ballot paper. Some people seh that dem gun look fuh de sexiest symbol. Well dem boys seh that if dem had a party dem woulda use a sexy woman as the symbol.
But talk fuh rain and talk fun sun, de campaign was sweet. Dem party spend some money like sand. De advertisement was in full colour and most tek up nuff whole page. De thing is that dem had some smart people. Couple television station charge more than dem does charge because dem know that all dem political party want fuh advertise.
Dem had a political party that didn’t have money suh it trust de ads. Dem boys seh is trouble fuh collect when de elections done because a political party is not a legal entity suh it can’t get sue.
But whatever de outcome dem boys want people realize that dem got to live together when de confusion done. Dem boys also wishing all dem contestants good luck and dem telling Bar Rat hit da road RAT!!!
Talk half. Lef half.