Dem boys seh...Rob-Bert got to get discipline

Dem boys seh…Rob-Bert got to get discipline

Nov 12, 2011 Dem Boys Seh, Features / Columnists, News

Rob-Bert is an upstart. Dem boys seh that he like dem li’l boys who bicycle ain’t got brakes. Dem boys plan fuh put ring in he mouth, he nose and most of all, pun he finger because dem picking up de people money.
Is something he learn from Bar Rat. But he got to worry bout Donald and Ramjattan and Granger. All of dem done seh that dem gun deal wid corruption and send who got to go, to jail.
Dem boys see that right now India got a big telecommunications scandal. A Minister get charge. He short and he look like one of dem right here. He going to jail. De thing is that he is only one in India. Guyana got nuff.
If Guyana used to do that things woulda be different. But if everybody thiefing then dem don’t have nobody who can tell de other one fuh stop.
De other night Moses guh to Parika and he talk he mind. He know all who is thief. He tell de people how Irfaat got nuff house and he can’t explain wheh he get de money.
De problem is when de investigation start people does run and lef dem assets. Irfaat done put on too much weight suh if he got to run he can’t run far. He definitely going to jail.
Donald tell some of dem to put back wha dem tek but some of dem suh greedy that dem think is joke.
And dem boys seh that some people still collecting money from all de thieves. But dem got to go to meeting. All de laptop people got to do campaign wuk and de government people vex because somebody seh that de government spying pun al who get laptop. De laptop is a spy device.
Talk half. Lef half.