Dem boys seh...De race is fuh who can thief

Dem boys seh…De race is fuh who can thief

Sep 27, 2011 Dem Boys Seh, Features / Columnists, News

People know that dem deh between de devil and de deep blue sea. Dem boys point out that de PPP always talking bout de PNC and 28 years. Now dem PNC people talking bout de PPP and dem 19 years.
Back and forth dem talking and de thing get suh big one of dem boys get vex. He seh that de PNC Kool Aid drinkers should not throw stones at de PPP sugarless swank drinkers. Dem had 28 years and de PPP have fuh pass that.
De only thing that gun save de country is if de PNC and de PPP disappear. All of dem corrupt. De PNC thief de mangoes and de PPP thief de mango tree, de mango farm, de land and de creek. In short dem thief everything.
Dem boys shake dem head and suddenly dem understand why money ain’t deh fuh pay people. And dem understand why BeeWee always got two first class seat vacant pun every flight—one fuh de Big Man and de other fuh Donald. Dem never know when de two gun travel.
But fuh sure dem gun be home fuh de rally in Berbice. That is de rally of all rallies. People gun hear things bout demself that dem never know. Some old people already start walking fuh meet de rally site in time.
And dem woman plan fuh cook at de site. Dem intend to mek de event a big sport because if is no sport then nobody gun tun up.
And of course, de song that gun deh playing all de time is ‘Dem a Watch me Pocket’. That is because de pocket fat.
Talk half. Lef half.