Dem boys seh....Name did call, but who own?

Dem boys seh….Name did call, but who own?

Sep 13, 2011 Dem Boys Seh, Features / Columnists, News

Mouth open, story jump out. De government newspaper jump and claim how de Waterfalls Boss man call de names of people to de Americans. Dem print de wrang name though. De boss man call all de Bees and dem boys know dem. He tell de Americans how dem does thief and thief big, without limit.
Nuff of dem hide dem thiefing money in India and China. That is why dem Chinese getting all dem contract, even de contract fuh de waterfalls. Dem Chinese get de laptop contract, dem get de wireless cable contract and dem get de Skeldon factory.
Every contract had a big kick back and when dem same government people send dem money to China dem fool de nation that dem paying de Chinese contractor fuh wuk. This time dem banking wha dem thief.
Is de same thing mek nobody not funding de Amaila project. De people claim how it too high. Dem boys sure that if anybody fund de project it gun be some Chinese bank. And when dem boys check it gun be de same money that de Bees salt away. Before you know it is de Bees gun own de hydro project.
Dem boys seh that this thing start since dem was building de stadium. Dem use an Indian company.
Talk half. Lef half.