Dem boys seh...Shame got de Big Man bad

Dem boys seh…Shame got de Big Man bad

Sep 12, 2011 Dem Boys Seh, Features / Columnists, News

Is a long time dem boys never see de state instigate anything. Dem grow up knowing that de state does wuk fuh everybody. That change and all because of people exposing de thiefing that going on.
Is whole week de Chronicle carry one story. Nutten new. Is like if dem want mek sure that people see dem story bout de Waterfalls boss man. De fuss time dem claim how dem get de story from WikiLeaks and that is de only WikiLeaks report dem carry.
Then dem get real dirty. Dem claim how de Waterfalls boss man is a snitch. But dem boys want to know who is more snitch that de Big Man who tell dem Americans that he gun knock off de Lunchman. Then he get in a corner and he tell de Americans fuh tek way Henry de Yellow visa.
Now dem claim how de Waterfalls boss man had money fuh Roger Khan. But is de same people who use to complain how de Waterfalls boss man rich. Dem boys want fuh know how come dem government people get bassody.
De boss man was rich before Roger Khan come to Guyana. And he nevah do anything illegal fuh get he money. He nevah THIEF.
Some of dem boys believe that de government suh vex that all de thiefing scheme getting expose that dem hoping that somebody kill de Waterfalls boss man fuh shut he mouth. Dem hoping that by creating a drug connection, somebody gun hurt de Waterfalls boss man.
But that ain’t gun stop de skin up. All de corruption gun be exposed. In fact, dem boys seh that dem gun get more serious because dem know that from the very top de government people worried. Dem got nuff that dem want hide but de thing opening up like when dem boys peel orange.
But since when a government does encourage violence? Dem boys seh that is only in Guyana and only when people shame. Shame does mek people do dangerous things. Some of dem shame because dem thief and get lock down in de jar. That is wha dem boys seh.
Talk half. Lef half.