Dem boys seh... Nine commandments lef

Dem boys seh… Nine commandments lef

Jul 26, 2011 Dem Boys Seh, Features / Columnists, News

When Moses was leading de people to de Promised land he tek time off fuh go into de wilderness to pray. He spend forty days and when he come back he come wid Ten Commandments.
He give de people and tell dem that dem had to live by these commandments if dem want to enjoy a good life.
Dem boys seh that de people in Guyana really punishing because de big ones done away wid one of dem commandments and is only nine lef.
Now de world know that de Ten Commandments was like de ten fingers people got. Dem, boys know that if one of you fingers cut off you already disabled. Dem big boys mek this sweet country disabled and all because dem thief out one of de commandments.
People don’t have to ask is which commandment gone. It surely ain’t de one that tell people ‘Thou shalt not kill’ although people killing like if it going out of style. But then again, that is because dem drop one of de commandments.
Is not de one that talk about coveting ‘your neighbour’s wife’ although every night dem can see some big ones wid other people wife and li’l children all over de place.
And is surely not de one that talk about “Thou shalt not commit adultery’. Dem boys shame fuh even consider that one because dem see so much adultery that dem believe it is a way of life. Some people even got dem wife home and dem carrying home other people woman. Sometimes dem does go pun de seawall.
De commandment that dem drop is ‘Thou shalt not steal.’ Dem boys seh that dem big ones thiefing everything, right down to steel.
After all, dem boys know de Good Book also seh that man shalt not live by bread alone suh dem big ones mekking sure that dem get bread, jam, nut butter, cheese and everything. When it come to de Treasury, ha ha haaa.
Talk half. Lef half.