Dem boys seh...De government spying pun people

Dem boys seh…De government spying pun people

Apr 18, 2011 Dem Boys Seh, Features / Columnists, News

Technology does mek some societies great. Guyana moving fast to get technology. It bringing in spy cameras fuh see who doing what, it setting up a place fuh listen in to people conversation, and it giving away laptops fuh mek poor people learn bout computers.
But dem boys want fuh know if is good intention because a man run away to Canada wid a big story. He claim how de government ask he fuh spy pun people computer fuh see who dem talking to. It is called hacking and this man claim how de government ask he fuh get into people computer.
Dem boys want to know if dem ain’t got wuk to do. Is only people who don’t have nutten to do gun spend time listening to who talk to who. De man claim how some people ask he fuh go into Freddie computer because Freddie talking bout nuff thing. Dem want know who he talking to and who talking to he.
But that is only one man. Dem boys want know who else spying and who dem spying pun. De Waterfalls boss man know that dem does listen to he conversation and he don’t care. He does even talk bout who wife going out wid other people. Well he don’t know if dem does pass on that information.
Dem boys seh that hack got hack back. Dem sure people peeping into de government people business. But de law twisted. If dem get ketch is jail but if de government get ketch is nutten.
De hacking thing got other issues. People gun hack into bank accounts and some of dem gun thief people money. Already de government peeping into people bank account and it ain’t got nutten to do wid looking to see how much dem can contribute to de election campaign. It got to do wid who giving money to who.
And de same spy thing got nuff Ministers hardly using dem cell phone. Dem frighten dem own people because nuff of dem got things to hide. Instead, dem does write note.
Talk half. Lef half.