Dem boys seh... Woolford get cuss and he can’t cuss back

Dem boys seh… Woolford get cuss and he can’t cuss back

Jan 29, 2011 Dem Boys Seh, Features / Columnists, News

Ever since de waterfalls paper start talking bout corruption, everybody joining in. Bharrat tell dem soldiers that de people who does deal wid gold and diamond corrupt. But as old people seh, wrong thing never got owner. De people who dealing wid gold and diamond deny.
Up comes Robeson and he seh that dem lie; that dem corrupt. He seh that Sam know de story and Sam got to check dem out. Now dem boys want to know if Robeson know that dem corrupt and he was wukking wid dem fuh years, why he never do nutten? Of course, dem boys seh that it got only one answer, that Robeson was part of de deal.
Woolford, de man in charge of de organization that getting blame announce how he is a church man and he ain’t deh suh. He seh that de government people who blaming he don’t know wha dem saying.
But he can’t cuss back because he gun lose he wuk. He got to tek de cuss although he tell de Big Market paper that de government—and he mean Bharrat and Robeson and Sam—don’t have evidence.
Dem, boys want to know if he telling dem in a smarty way, that dem mekking up de news. He can’t talk plain but in any case, he can always claim how de newspaper misrepresent he.

Talk half. Lef half.