Dem boys seh....Is anybody can run this country

Dem boys seh….Is anybody can run this country

Jan 16, 2011 Dem Boys Seh, Features / Columnists, News

Don’t play dead fuh see wha funeral you gun get. Dem boys learn that de hard way. Dem was at a political forum and dem hear some people talking bout mekking a run fuh de office of president.
Was joke dem was mekking but dem boys decide to tek dem serious. Next thing a man believe that he got a chance and he mek a run. He is a lawyer and he represent nuff people. He now sending out notice to all of dem that he represent that dem should support he.
But de thing is that dem have to be a member of he party because is de party that got to nominate he. And dem people he represent ain’t got regard for nutten. He now trying to see if he can get dem to join he party but dem commit so much crime that other lawyers represent dem.
Khemraj mek a move pun some of dem only to hear that another lawyer who running fuh de presidency done give he a tackle.
Is Burnham start this stupidness bout lawyer running de country and since then is nuff lawyers tekking over. Even Obama had something to do wid de law and he is de US president.
Suh dem boys count all dem party people who is lawyer and who was wither president or who want to be president. Burnham, Hoyte, Corbin, Murray, Basil, young Bond, Khemraj, Raphael, Moses, and Ralph.
Bharrat is de only economist and Sam was the only engineer just like Cheddi was de only dentist. Is every class of worker either running or trying to run Guyana. A labourer also mekking he pitch.
Talk half. Lef half.