Dem boys seh... Santa bypass OP

Dem boys seh… Santa bypass OP

Dec 18, 2010 Dem Boys Seh, Features / Columnists, News

Santa come and he visiting every place except one. He even been to de Essequibo Coast and he looking after all dem li’l children. De other night he go to de GT&T Christmas show and he wear blue.
Dem boys seh that de man look too sweet. He was so good that Robert of Agriculture carry he son and he didn’t even put down de boy fuh walk. He lift up de boy and push dem children one side because he want he son to get he toys.
Now dem boys know that Robert ain’t poor and that he coulda buy toys fuh every child in de crown, yet he guh fuh free toy fuh he son. That is cheapness or bad habit according to dem boys.
And all that happen because Santa refuse to go to Office of de President. He announce that he does only visit people who good. Dem boys want to know what message he sending.
Bharrat was good and Roger was good. Dem boys couldn’t talk bout Gail because dem didn’t see she most of de time.
Next year gun be different because de Waterfalls paper intend to change all that. It start to set up a slush fund. Every extra money going into de fund. De boss man seh that de proceeds from every paper that sell going into de fund and no tax wouldn’t be paying.
Of course, dem boys seh that dem don’t intend to mek Khurshid happy wid other people money.
Talk half. Lef half.