Dem boys seh....Kwame mek a stunning skirt suit

Dem boys seh….Kwame mek a stunning skirt suit

Dec 13, 2010 Dem Boys Seh, Features / Columnists, News

People still talking how Bharrat behave bad in Mexico. Some of dem seh that de man right because he spend good money to be there. He buy suit fuh he delegation. Dem boys seh that ordinary people who look at de suit can’t tell de cost but de people in Mexico know.
One man look at Bharrat suit and claim US$7,000 and all Bharrat do was smile. Then dem look at de other members. Bobby suit cost nutten much because de man pun Lombard Street mek it, just like how he mek de suit fuh de other members.
Dem boys seh that Kwame was certain that he and all going to Mexico suh he order he suit. If you see de suit.
Dem boys still laughing. Was a skirt suit that woulda mek Jennifer Westford envious. Was a brown and de skirt was a mini but de blouse was a low cut.
That ain’t de only thing that cause a stir this past week. Dem boys see a certain Minister pun Sheriff Street. De man smiling wid everybody because he was suh drunk that he couldn’t find he own car.
And de woman who was wid he look clear and cool because she know that she gun mek a raise, even if she got to go in he pocket when dem reach home.
Another one guh wid he staff fuh celebrate a birthday. Dem boys seh that he cheap because he shoulda sport de staff instead of mekking de poor PR man spend good money. But is he fault because he coulda buy couple box of fish and chips or some Royal Castle. But not he. He tek de people to Buddy’s.
But then again, dem boys seh that dem have something name shadow buying. That mean that you call and somebody else pay.
Talk half. Lef half.