Dem boys seh...Ex TV man fighting wid heself

Dem boys seh…Ex TV man fighting wid heself

Dec 09, 2010 Dem Boys Seh, Features / Columnists, News

Two months ago de people who organize de climate change forum announce how dem refuse to invite any head of state. Dem claim how de head of state dem does hijack de process.
Bharrat is a head of state. He didn’t get invite but he gone to Mexico. He carry some of he friends, including a man who get an injunction to prevent anybody from even writing he name in de papers.
Last night dem drink tequila and tonight dem drinking Corona. Then dem gun visit some cantina when dem woman does dance pun de table and sit pun dem man lap. Dem boys seh that dem now understand why all of dem gone to Mexico. Dem know that money deh in that country and dem deciding who gun get de lion share.
But while dem fighting over de people money one man beating up heself. Tony sell he TV station to de man who name dem boys can’t call. When he come to he senses he realize that he mek a big mistake.
Dem boys see he when he pass by de station and he cuff heself pun he nose. He did aiming fuh he mouth but he miss. Then he try fuh kick heself but he can’t do it good. He foot too short.
He can’t even kick crappo. Kwame volunteer to do de kicking wheh de sun don’t shine.
De thing wha got he cuffing and kicking is de new name. TVG. When dem boys find out what it mean dem hear that it mean TV Gone fuh good.
Talk half. Lef half.