Dem boys seh... Robert ain’t got de experience

Dem boys seh… Robert ain’t got de experience

Dec 07, 2010 Dem Boys Seh, Features / Columnists, News

De rains come and dem gyal tell dem boys that this is weather fuh young ducks. Dem boys smile and right away dem mind flash pun Robert. He is a young duck.
Dem boys smile and right away dem gyal suspect is something funny mek dem smile. When de gyal ask wha cause de smile, dem tell she “Robert”. Dem gyal suck dem teeth and reply that young ducks got to get experienced drakes. Robert too young and he lack experience otherwise he woulda never give away he house at Diamond and move to build one at Pradoville2.
De amount of money he got to spend pun building up de land is more than a normal house would cost. But dem boys seh that people got to understand that de man probably got more money than he can spend.
How he get de money? Dem boys seh that he and nuff of dem contractors is friends. He and Fip is friends too.
Then again, he sue Peter Ramsaroop and he expect to get more money but experience should tell he that de courts don’t give too much money as judgement. He ain’t an experienced drake suh he wasting de weather.
De young ducks just watching he and sucking dem teeth.
Talk half. Lef half.