Dem boys seh... De foreign people helping Guyana

Dem boys seh… De foreign people helping Guyana

Nov 27, 2010 Dem Boys Seh, Features / Columnists, News

A man de police wanted get ketch when all dem South American presidents come. De man and he friends been around all de time and de police didn’t even know how to ketch dem.
Now dem boys claiming that every time some foreign people come some wanted men gun get ketch. Dem men does come wid a whole heap of security equipment and since in dem country dem got real bad men, ketching de set who deh in Guyana is child’s play.
Dem ketch Fine Man and Skinny after a big event. Was Carifesta and nuff foreign people did come. This time dem ketch a man who dem seh help bun down de Ministry of Health.
Leaders come from Brazil, Venezuela, Colombia, Ecuador, Uruguay, and places like that. Dem come wid dem thing and all of a sudden, dem help Bharrat ketch again.
Now de police begging Bharrat to host a big conference or event whenever crime get out of hand. Dem done know that once that happen, bad men gun get ketch.
Talk half. Lef half.