Dem boys seh...Don’t play wid dem visa

Dem boys seh…Don’t play wid dem visa

Nov 12, 2010 Dem Boys Seh, Features / Columnists, News

A big summit coming up and Bharrat not going. Dem boys seh that he can’t go because he not invited and in any case, he don’t belong to de group. Is de G-20 summit. That mean de top 20 richest country. If was a G-189 summit, Guyana woulda mek it.
De last time Bharrat try to pope but he couldn’t even pass de fence to the compound wheh de summit was keeping. Even Barack ignore he when he drive in past de gate.
At least, Bharrat can travel. Some Ministers and other senior public servants can’t. Dem lose dem visa. Dem, boys seh that some of dem try to renew dem visa and get de bad news. “No”.
Dem embassy don’t like immoral people and all who fulling dem pocket by robbing de treasury, dem doing immoral things. Dem does tek way visa fuh people who do immoral things. De Auditor General talk bout dem immoral contractors. Dem boys seh that some of dem lose dem visa and dem know it.
Benn who actually try to defend why dem lef de weed in front of Freddie house do an immoral thing. But he can’t even convince dem li’l children in kindergarten Dem same children plan fuh pelt he fuh that nonsense he peddling. He betta stop because he visa might disappear like how plenty of he colleagues don’t have visa to travel.
Couple big public servants can only go to Trinidad and Barbados and Antigua fuh holiday. Dem can’t go to Puerto Rico and dem can’t go to de Bahamas. One of dem still crying how he contribute to Obama campaign and he visa still get tek way. He ain’t tell people that Obama send back he money.
Some of dem claiming how dem want to visit to buy equipment but no visa ain’t coming. That is why dem boys telling all of dem to do good. De penalty severe.
Talk half. Lef half.