Dem boys seh... Don’t mek joke wid seven curry

Dem boys seh… Don’t mek joke wid seven curry

Nov 06, 2010 Dem Boys Seh, Features / Columnists, News

Nuff people can’t see Christmas because dem already dead and nuff more gun miss it. Dem boys been counting and dem actually find out that nearly thirty people dead in de last month. Twelve dead in a minibus, a man kill another over clothes, couple crash and dead, some get shoot, some hang demself and then three children go and drown.
Dem boys seh that dem never see people disappear suh. De captain of de boat in which de children been when dem drown run faster than if he was running fuh de Olympics. He swim to shore and by de time he foot touch land he was late.
Dem boys want to know lang he gun run for. He like de gyal who claim that she get kidnap and how she get rape. She coulda send text message which mean that de man who kidnap she did really love she fuh lef she wid de phone.
Then dem boys find out de other day that de army had a big function and it serve seven curry. Dem soldiers eat like dem never eat before and when dem done one of dem had de nerve to ask fuh de chicken.
Dem boys seh that people should count dem blessings. Seven curry is a religious thing and because people tek it fuh granted de coast guard boat blow up. Is a warning. Dem boys sure that next time de army do seven curry dem gun mek sure that is not a sport. Talk half. Lef half.