Dem boys seh... Fip flips forty feet

Dem boys seh… Fip flips forty feet

Oct 31, 2010 Dem Boys Seh, Features / Columnists, News

Cat got nine lives. At least that is wha dem boys seh. When dem see a cat dead pun de road dem does seh that de cat live reckless and use up all dem life.
Dem boys seh that Fip got to be a cat because he got nuff life. He use up one de other day when he drive off de road and fall forty-foot down a gully. He buss he head and split he lip. He nearly knock out some teeth.
He was hoping to keep de crash a secret by de people at de Waterfalls paper got spies all over de place. Dem get photo of de crash and dem barely miss Fip holding he buss mouth wid de cloth pun he head coming out of de hole.
De same Fip mek a big noise about cyclone coming to Guyana a few days before.
And indeed, de cyclone, Tomas, did line up Guyana. De weather people issue warning and Guyana brace. Dem didn’t know how bad Guyana bad.
Tomas was coming but when he realise that was Guyana, he mek an about turn and head fuh Barbados. De cyclone prefer fuh deal wid any other country than Guyana. He abscond like de boxers.
This country really bad. And things bad too because money don’t come down. Dem boys seh that dem big ones hand tight.
But dem boys sorry that it didn’t even come to the Exclusive Economic Zone. That is de zone wheh Bharrat and he friends does exist. If Tomas did come it woulda is it that zone and clean all of dem up. He woulda even carry dem wid he. That is wha dem boys seh.
Talk half. Lef half.