Dem boys seh...Nuff things missing

Dem boys seh…Nuff things missing

Oct 22, 2010 Dem Boys Seh, Features / Columnists, News

Lang time people use to walk pun de road and find money. Dem use to find dollar and five dollar and twenty-five cents and things like that. De government then ban de cents and all of a sudden people don’t even find a dollar which don’t have value anyhow.
And is not that de country don’t have money. Bharrat heself seh that de country got more money than before. Suh why people can’t find money?
Dem boys seh that is because people got to find money to buy house lots. One man seh that people got to find money to bury dem family because people dying faster these days than long time.
Money is not de only thing that disappear from de road. Sane people use to walk pun de road. Now it look like is only mad people does walk and drive. These people does walk in front of speeding car; some does drive into truck and others does try to drive in trench and through paling. Is madness.
Dem boys seh that police pun de road use to keep an eye on people. These days de same police does keep dem eye pun people pocket. If a man pocket empty he can end up in trouble.
But is de way how things disappear from Guyana. Even food disappear from garbage bins because dem boys don’t see mad people diving inside fuh food.
And proppa English disappear from de radio, de newspapers and de TV. Some even believe that it disappear from school.
Talk half. Lef half.