Dem Boys Seh... De fire service want Viagra

Dem Boys Seh… De fire service want Viagra

Oct 09, 2010 Dem Boys Seh, Features / Columnists, News

Some people does sail fuh sport. Dem is de rich people who can buy big yacht and things like that. In Guyana dem have nuff people sailing. Even de police sailing.
Henry, de Commissioner sick suh he lef nuff people to run de show. One man responsible fuh vehicles, one fuh parades and one fuh crime. De crime man send out nuff wanted bulletin.
Dem boys seh that dem never see suh much and de thing is that de people who wanted just walk in to de very police. Dem boys waiting to see how de investigation gun end up. Dem sure that de same speed that dem man walk in wid is de same speed dem gun walk out wid. That is because de police sailing.
But de fire service wuss than de police. De main man, de Gentle giant, stage a show. He bring out he equipment to reach de top of a building to show how de fire service can tek people off de tallest building.
De show start but fuh some reason de equipment could not get up. Dem boys walk up to gentle and tell he that de equipment want Viagra. And it look suh to everybody because de thing was limp after a shaky start. Now dem boys want to know if is de same thing fuh de whole fire service.
Talk half. Lef half.