Dem boys seh...De percentage confuse Uncle Adam

Dem boys seh…De percentage confuse Uncle Adam

Oct 06, 2010 Dem Boys Seh, Features / Columnists, News

De other day de Waterfalls paper report that GT&T give nuff money to OP and that people didn’t know. Is true that people didn’t know but is not that was a secret because de contract order that de telephone company pay a small percentage of revenue to de Minister responsible.
Two things wrang. De reporter who do de story get suh confuse wid all dem decimal and percentage that he mistake big for small. Uncle Adam watch de story and get ketch because of de same decimal.
De Boss man tell he that he need thicker glasses. He going to de dentist tomorrow to fix it.
Dem boys know that he old and Bharrat know too suh when de mistake appear it shock de people at Office of de President. But dem decide that was a big thing suh whole day yesterday pun de radio dem highlight de mistake.
De Attorney General smile because he believe that he gun get a chance to do some wuk. He anxious to file writs. But was de radio and TV that mek nuff noise bout de mistake. Dem boys understand because dem don’t normally get news suh anything wha de Waterfalls paper do does mek news.
Uncle Adam sorry and de reporter shame. De boss man considering fuh cut dem pay and give it to de state, as compensation.
He gun get cameras and thing fuh hand over de money to Kwame. Whether it go in de Treasury or otherwise don’t matter. After all is Kwame.
Talk half. Lef half.