Dem boys seh...De Conquerors vex

Dem boys seh…De Conquerors vex

Sep 16, 2010 Dem Boys Seh, Features / Columnists, News

De Amazon Conquerors vex because dem boys cuss dem fuh de poor performance. Dem got a right to vex because dem mek a whole country vex wid how dem play. People lose money and some get high blood pressure Sunday.
De team struggle from de start and every ball de people in Guyana hope fuh drastic improvement but was de same thing. When de match done de people in de team talk bout how de place cold, how de pitch got extra bounce and extra pace.
All dem team that play face de same condition. India got flat pitches just like Guyana but dem team adjust. De Amazon Conquerors got professionals just like all dem other team suh dem boys refuse to tek de excuse.
One of dem boys who deh wid de team write how de Waterfalls paper was unfair. He got he views just like everybody in Guyana and he got to tell dem that dem got to lift demself.
Mumbai Indians wid some big names lose two games and de man wid de team mek a note of that. De Amazon Conquerors playing that same team today. Dem boys waiting.
Talk half. Lef half.