Dem boys seh ... Sam done play sudden

Dem boys seh … Sam done play sudden

Aug 10, 2010 Dem Boys Seh, Features / Columnists, News

De other day President’s College celebrate its 25th anniversary and everybody was kind of proud. De school was supposed to be de leading one in de country when it start. Then it slip to number two. Today it lower than St Rose’s and St Joseph, but de people was still happy.
De mistake somebody mek was to talk ‘bout de good days and de bad days when Sam was sitting in de audience. Sam talk something ‘bout how de school produce people who tun leaders of sorts and then somebody blame de government.
Well dem boys seh that Sam create history. Was de first time de guest of honour pick up heself and walk out from a programme. Is then dem boys realize that once people talk bad bout de government de government gun walk out. But de same government does talk bad about everybody.
But then again, it coulda be that he had diarrhoea and had to walk out before he stop de programme.
What dem boys find strange is that none of de newspapers report pun de walkout. Was like if it never happen. Dem boys seh that was de same Sam who walk out from de Prime Minister wuk two times suh it got to be that he is a walkout specialist.
He woulda walkout from State House when Bharrat invite dem Buxtonians and that is why he didn’t get invite.
Talk half. Lef half.