Dem boys seh...Bharrat want $10 million

Dem boys seh…Bharrat want $10 million

Jul 14, 2010 Dem Boys Seh, Features / Columnists, News

It was only a matter of time before Freddie woulda get Bharrat mad. It happen and Bharrat suing from Harry Right to Harry Wrong. And he want $10 million.
Bharrat already sell he house and he also tell de world that he got money in de bank—at least $5 million. He mean he gun nail Freddy.
Now Freddie don’t have that kind of money but that is de case. Bharrat mean that when he done wid Freddie he ain’t gun got nutten. He ain’t got luck like dem cantractor who smile when dem hear that de Lethem road break up.
Dem see money and dem see smartness because dem know that every time de road break away is money. But de people got plans fuh dem because dem would have to live right wheh dem wukking. And even when dem done dem have to remain right there fuh a few months in case dem do kack wuk and de road break again.
And is nuff people suspicious. Robert was suspicious of Errol at Guysuco and was one big cuss out. One man tell de other that he dunce and de other one respond that he got power. Everybody know wha happen.
Uncle Freddie gun find out what power is and ‘dem boys really sorry because dem know that this is a case of killing a bug wid a sledge hammer. Uncle Glenn done holler, ‘BEEF nah got bone dawg nah business.”
Talk half. Lef half.