Dem boys seh...Is a jackass parade

Dem boys seh…Is a jackass parade

Jul 09, 2010 Dem Boys Seh, Features / Columnists, News

Big cuss out break out de other day when Odinga call Robeson a jackass in front of everybody. Dem boys seh that Robeson see red and right away he call Bharrat. He tell Bharrat that he would not continue pun de land committee once Odinga remains.
Nobody don’t know why Odinga don’t like Robeson. Some seh that Robeson cutting up he runnings; some seh that is because Odinga miss out when people pay fuh set up stall by de roadside and Robeson break dem down.
Is two things dem boys now thinking about. How Odinga get pun any land committee when he get accuse of huffin’ land and selling it fuh mek a big profit? And to mek matters worse he ain’t even pay tax pun de money he mek.
Then dem want to know wha Robeson got to do wid land except bruck down things that deh pun some land that he claim is government own. Everybody know that he graduate from hammer to chainsaw.
After Robeson mek de complaint, Bharrat carry Odinga wid he to Jamaica. Dem boys claim how is to plan more strategy fuh Odinga cuss Robeson. And of course Odinga, being a roots man, gun mek contact wid some of de men who survive de attack against Dudus Coke. It gun be de Jamaican coke men against Robeson’s chainsaw gang.
And dem boys seh that Robert still pumping. Is like he don’t have anything else to do. But then again he promise Miss Diamond a lot but she end up wid more water than she could handle. Now Robert and Irfaan got more pun dem hands. Is nearly one week and they still pumping.
Talk half. Lef half.

Quote: “If you don’t like someone, the way he holds his spoon will make you furious; if you do like him, he can turn his plate over into your lap and you won’t mind.” – Irving Becker