Dem Boys Seh... Shaik want courtesy

Dem Boys Seh… Shaik want courtesy

May 18, 2010 Dem Boys Seh, Features / Columnists, News

Some people does want respect and dem don’t even give respect to anybody. Imagine that Shaik get vex when de newspaper carry a comment by Patrick Yarde how he, Shaik, seh that he cant wuk wid de lady who doing de wuk as Chief Education Officer.
In de fuss place all Shaik was doing was maintaining de tradition of having all dem actors in place.
Anyhow, dem boys seh that when Patrick Yarde mek de announcement and Shaik seh that he never seh suh that shoulda been de end of de matter. Instead, Shaik claim how de newspaper shoulda call he.
Well dem boys know that de newspaper was calling he fuh other things and he never answer he phone. Reporters even camp outside he house, dem camp outside he office and he refuse to put he head outside. He didn’t want dem to ask he bout dem schools wha he build and wha giving problems right now.
He never think bout courtesy then and now he talking bout courtesy. Dem boys seh that he is a brave man.
Well since he want de newspaper to contact he that is wha gun happen. Dem boys expect de courtesy of an answer when dem ask he how much he spend pun dem schools; when dem ask he how much dem security guard does get pay. Especially de set that associated wid one of he employees.
Talk half. Lef half.