Dem Boys Seh... Robert learning tricks in Israel

Dem Boys Seh… Robert learning tricks in Israel

Mar 27, 2010 Dem Boys Seh, Features / Columnists, News

Is confusion at de Government Quarters. People now thiefing current like dem head ain’t good, because dem claim how somebody set de precedent. That is why Henry Rodney move in after some mad lady bun down he house. Life suh good that he now don’t have to pay fuh water or lights.
But while some hustling in Guyana some gone overseas to hustle. Robert gone to Israel wheh de government decide to build settlements pun other people lands. That is a learning experience fuh Robert.
Dem boys seh that he was practicing wid Guysuco lands because he mek people build houses pun lands at Diamond, Wales and some other places. Guysuco tell Robert that he got to pay and Robert stretch he mouth because he know that in Israel nobody don’t pay fuh other people land.
Dem boys seh that is why he gone there. He gun also try to get some contract fuh drainage in de desert. Israel know bout digging drain but de country don’t promise to put water in dem drains. Robert would like to do that as a professional.
Therefore, is problems when he come back. He gun dig drains like mad but dem farmers mustn’t expect water. Robert gun tell dem that in Israel drains don’t carry water. Yet people got to pay.
And Bharrat seh that he don’t spend plenty money to travel. He claim that other people who does travel does spend more than that. He don’t stay at fancy hotel and he party does be small. He pocket piece does also be small. Ask Ashni.
But dem boys seh that one, one dutty build dam. Every trip a small piece does tun a big piece. Talk half. Lef half.