When dem arrest de REO people expect fuh hear all de dirty story—how who thief and who encourage who, and who tek bribe. Dem boys sit back but all of a sudden is like people get frighten.
Dem boys seh that somebody corner de REO and tell he that he gun get back de wuk if he keep he mouth shut, especially if he don’t talk wha he know about de Permanent Secretary.
But Peck know a thing or two because he pelt some big stones at de REO. He even talk about de REO paying fuh contracts that were never executed. If this is de case de REO know that he in trouble but yet he ain’t talking.
Then dem have de people who collecting drug money. Clement announce big and bold that he not in any drug dealer hand. When he said that some of he colleagues decide to bend dem head in shame.
People want to know who got dem self in drug dealer hand. Dem boys seh that people want to know plenty things.
Somebody give a contract fuh dig drains to avoid flooding de other day. Robert announce that de government was tekking flood precautions. But de same Robert had equipment that tell he that a big drought was coming. He didn’t need to spend money on any drain. But he spend.
Dem boys seh that de same drain now full wid dry mud but money spend and most of de drains dig in Region Four, de same place wheh dem got de REO in pickle.
Talk half. Lef half.
Discover more from Kaieteur News
Subscribe to get the latest posts sent to your email.
