Dem boys seh...De spying start

Dem boys seh…De spying start

Feb 12, 2010 Dem Boys Seh, Features / Columnists

Bharrat get vex yesterday and all because de WPA claim how he want to spy pun people. Last week, de government announce that it building a spy centre. Well that mek de WPA see red. It use to get spy on by de Burnham Government.
Dem boys want to know why people got to vex if de government spy. Is everybody spying. Man does spy pun he wife and wife does spy pun dem husband. Children does spy pun dem parents when de night come and reporters does spy pun one another fuh see who know what.
Special Branch does spy pun Benschop and GPL does spy pun all dem who don’t pay light bill and thiefing current.
Dem boys seh that is better de government spy because de information gun remain secret. Most time when people spy pun one another dem does talk de people name. That is how dem boys know that de Guysuco man does get so much money and de pensioner at Finance does get more than one million dollars per month.
One man go to de miners meeting and since he get lock out he decide to spy from outside. Is either he did drunk like dem cane cutters who had a meeting wid Robert or he eye wasn’t good. He call Bharrat Hugo Chavez. Is ban he get and from de time he lef de meeting de police was walking behind he all de time—spying. Dem boys seh that dem tek de hint and that is why dem got three phone. Two fuh de regular call wha dem can spy pun and one secret phone. Don’t worry bout name and registration. Some people got four ID card and is Bharrat mek suh.
Talk half. Lef half.