Dem boys seh....Is Dr Bharrat now

Dem boys seh….Is Dr Bharrat now

Feb 08, 2010 Dem Boys Seh, Features / Columnists, News

People use to talk and dem use to wonder wha Bharrat gun do when he term done. Well de man is a doctor and from now is Dr Bharrat or Dr Jagdeo. Is now people understand how de man good at many things.

He good at economics and now he is a doctor. But dem boys seh that dem gun watch and see who go to he clinic because some doctor does mek mistake and people does dead.

Uncle Glenn and Uncle Adam gun be among he patients because dem know that dem gun get sick some time. Dem got some doctor who hate dem and would give dem wrang injection from de time dem two enter de clinic.

In fact, dem boys advising dem not to go to de Georgetown Public Hospital because dem carry all kind of things in dem paper cussing de hospital and dem have de senior people in de hospital writing response. One senior man even go so far as to write how he waiting fuh all who blaming he hospital fuh things that nobody shoulda talk about.

Dr Bharrat ain’t gun wuk at Georgetown Hospital because he gun have to report to Madan and Michael. He got money fuh set up he own clinic because he done arrange he pension, which is something Uncle Adam couldn’t even do and still can’t do.

De title is important. A man even change he fuss name to doctor, suh when people call he dem got to call he by he name, Doctor. Bharrat ain’t like that.

But dem boys advising he to practice pun dog, cat, donkey and horse before he tek on people. De future is bright Dr Bharrat. Dem boys want to know if dem gun have a Dr Sam or a Dr Donald or a Dr Robert.

Talk half. Lef half.