Dem boys seh......Is more questions again

Dem boys seh……Is more questions again

Dec 28, 2009 Dem Boys Seh, Features / Columnists, News

De Christmas over and is back to wuk. Is also back to de questions and answers.

For example, dem boys want to know why Bharrat, when he come from Copenhagen and land at de airport, refuse to drive down. Dem boys seh that instead, he decide to fly by helicopter to de city.

De question is why? And de answer is that he ain’t get de money he expect from Copenhagen and he didn’t want to face de reporters.

Dem boys seh that was joke when he decide to fly. Some really big ones decide that dem gun go pun de chopper too. Dem was too big.

Henry fuh one. De chopper couldn’t lift off. This time dem boys seh that he done send way he car. He nearly had to walk.

And another question is whether Prem does wuk. He using de office and instead of channeling interesting notes to de president, he only writing letters in de paper. One day Bharrat had to ask whether he, Prem, still in de Office of de President.

Dem know that Navin gone fuh mek space. Dem know that Prem tekking up space in OP and at UG.

And dem boys want to know how come dem Ministries ain’t had no Christmas parties this year.

De answer is that people thief out de money before Christmas come suh de Ministries was broke. De plan is to have one party fuh all before de end of de year.

And why Bharrat didn’t host a drink fuh de media? De drinks money help pay fuh he international travels and food fuh Odinga who does eat like wood ants.

One more question. Wha happen to Maria van Beek? She deh in Guyana or out? She still pun medical leave or she just run and gone? She still getting pay though.

Talk half. Lef half.