Dem boys seh... Dem Woman Tired

Dem boys seh… Dem Woman Tired

Dec 25, 2009 Dem Boys Seh, Features / Columnists, News

Today is a special day fuh some people. All of dem feel that is de best day in de year and that nobody should deny this fact.
What dem boys know, though, is that Friday is a religious day fuh Muslims. In Muslim countries, Friday is like Sunday because all dem business does close and nobody don’t wuk. Well Christmas is a Friday, which is today and dem boys want to know how come dem Muslims celebrating Christmas this year.
And de funny thing is that if somebody refuse to celebrate Christmas he neighbour gun get vex because de neighbour done decide that de man cheap, that he don’t want spend.
Anyhow, today is a good day. Imagine dem boys dem inside hiding because dem don’t want people visiting dem and dem got good stocks. Dem get free rum and free vodka from some friends.
One man stove and he fridge got de same temperature. He refuse to cook because he claim how he was cooking whole year and today he got to eat free. He already get some cake and a shot of rum and dem boys seh that if he continue like that he gun either get cirrhosis or diabetes.
But is dem woman. One man wife still sleeping and de man vex. De woman spend whole week decorating fuh today and now today come she suh tired that she can’t even keep she eyes open. She can’t enjoy she decoration pun Christmas Day.
But de man still vex because he get he bonus from de Waterfalls boss man and he spend to bribe he wife. She ignore de bribe but he better understand that she tired today but she ain’t gun be tired tomorrow.
Talk half. Lef half.