Only one Pump Man lef

Aug 28, 2009 Dem Boys Seh, Features / Columnists

Old people know dat dem got things dat does run and hide whenever light shine pun dem. For example dem have cockroach and bedbug and even bat. Dem like de dark.
Some people like de dark, too, because dem believe dat people don’t see dem. Tek young lovers. Dem does do things in de night dat does only show up in de daytime after dem gyal body start to experience certain changes.
Then you have de thieves. Dem is de people who does move like vampire, only in de night. Is not by accident dat most of de thiefing does tek place in de night. De darkness does hide plenty things.
Well sometimes, people don’t even have to come outside but then dem always have people who does buss de bag. De Waterfalls paper buss a lot of bags and end up getting cuss. Even Ashni join in de cussing and is so people know dat he too does cuss even though he look like butter can’t melt in he mouth.
Everybody talking bout dem high contract and dem boys seh dat people got to understand dat everything dear so de government had to match up and mek dem contract dear too. If yesterday it did cost one million dollar today it gun cost four and when dem people from de Waterfalls paper ask, dem does hear how is inflation.
Inflation mek de country only got one man as de pumper today. Guyanese does call he de Pump Man. All de rest dry out because of inflation too. Too much water had to be pumped and now dem dry suh till dem even have problems at home. But not Tulsi.
Dem boys seh dat he got a reservoir and he is being paid well fuh de supplies. De other day de government pay he very well fuh Stanleytown suh till he tell lie bout how people want to cut up he runnings. He even blame de Waterfalls boss man who seh dat he can’t even remember talking bout de man.
Is some of dat runnings helping put some private cars pun de road. Imagine Khurshid boast that PLL create a record and that in two weeks more than 333 PMM cars deh pun de road. What Khurshid ain’t tell people is dat some of dem been pun de road even before PLL finish.
Well de PNC worried because PPP coming out, and by elections time, almost all dem cars gun be PPP. Of course Robert, de man in Congress Place, might write to Bharrat asking he to skip de registration. And he gun also write to de international community to protest unfair electioneering.
Dem boys seh dat dem can hardly wait. During elections dem have a rule dat no party slogan should be in de vicinity of de polling place. Dem boys now want to see how even Raphael might launch a protest against all dem PPP cars that might park on de road near polling station.
Khemraj already seh how he gun wait to trade in he vehicle and Sheila seh that she might apply fuh a special plate. Talking bout plate. Dem boys seh dat Bharrat ain’t call no press conference yet because he trying out fuh plates. De other day he go to de Short Man (not Roger) to ask he bout he dentist and CN send he to Anand pun de East Bank. Anand done decide dat inflation affecting he too suh he price gone up as high as dem contracts. He might end up like Tulsi, being de only one lef in he trade.
And talking bout trade, Bisram deh arguing that he got a trade to conduct polls and Freddie claiming how de man ain’t got such a trade. Dem boys want to know if dat is serious business. If a man conducting poll is he business but Uncle Freddie, when he got something he don’t let go. He like dem pit bull.
Is de same thing wid GPL. Of course de company want money and one way is to estimate readings. De other way is to introduce pre-paid meter. De meter was long in coming and it was supposed to help people save money. Now people complaining how it actually costing dem more.
Dem boys seh is one of two things. Is either people use to thief current and now dem have to pay de real cost or de power company thiefing dem money.
Corbin want Sherlock Holmes to come to Guyana to investigate this problem and Trotman getting up a team of lawyers to defend or prosecute—whichever.
But dem have other investigation on de plate. Dem have de Roger Khan thing; then dem have de PNC elections; then dem have de Bharrat refusal to hold press conference. Is nuff thing pun people plate.
Talk half. Lef half.