Many a tear has to fall

Jan 30, 2009 Dem Boys Seh, Features / Columnists

Last week was sour food in dem tail at Parliament. Some reporters smell de food and walk way but dem had some of dem eat and still deh pun de toilet.

When de Speaker find out de food sour and ask wha happen, de person sharing de food tell de man how is a special seasoning dem use.

Well on Thursday was a different story. De people light up dem pan warmer just like when you deh at Pegasus and dem fancy eating place. Dem mek sure that de food keep warm fuh de people who going to parliament.

But dem boys seh that once bitten twice shy. Dem reporters who maintain a constant relationship wid de toilet after de sour food frighten to eat although the food hot. But de tears water up dem eyes because dem see de food and frighten to eat.

Talk bout crying, a certain Minister cry when he colleagues tantalize he about he donation to farmers of a lil tree and two seed. The man cry so till he refuse to tour and mek statements like how he used to just a few days before.

He tell some friends that life is a bitch. But sometimes dem boys does see strange things. De man get some people to start a letter campaign against de Waterfalls paper. Dem even sign some people name, not knowing that de very people can’t read and write. Dem boys still laughing.

And when people vex and crying people does hear some stupidness. De man cuss de reporter who promptly buss de story bout de problems in de sugar industry that mek Guyana got to import sugar.

De woman even got he running because when he see she coming in parliament he late, ignoring all dem reporters who asking he questions. De other day he nearly fall down.

A senior policeman cry too. De other day de force put out a list of promotions. Well according to dem boys, some police ranks does skive whole year and when is promotion time is then dem does wuk.

This policeman was on de road; he stopping traffic, he chasing thief, he racing behind escaped prisoner and everything. When was promotion time he name was not on de list. In front of he friends he try to keep a straight face. Then he went to the bathroom in de Mess. Was Old Year’s Night. He in de bathroom and people line up outside because de party was really swinging, especially de women.

De Commissioner pass and see de line, then he enter; he hear a funny sound like if people drowning. Is cry de big man crying. When Henry ask if he sick, de man holler how he sick of de force and de Police Service Commission and de Commissioner and Bharrat and everybody.

Dem boys seh that he gun remain a Assistant Superintendent fuh another three years. He talk to de wrang man.

Dem have other things that causing problem. Dem boys hear that de Waterfalls paper boss man got magical powers. De man lef de country fuh de same States which dem other boys claim that he couldn’t go to because he visa get revoke. Dem ain’t stop there. De man deh in de states but dem people claim how he beat he wife. She deh in Guyana and he deh in de states. That got to be some magic that only de lil plant and two seed man and he people can come up wid.

Is de same thing de write bout a man who divorce six years and dem claim how he married. De same people who trying fuh mek joke in real trouble. If dem don’t report to Uncle Robert Montgomery on de hour every hour to get things to write suh people gun be distracted.

But dem boys seh that it gun tek more than that to hide de Skeldon White Elephant and de fact that some of dem people who hide money in Canada gun get skin up because of de Republic Bank thing.

One man hide suh much money that now that dem freeze de account to allow for de investigation he can’t pay he sweet woman rent and she done tell he that she gun talk, then she gun tek over de apartment in full; then she gun bring in a new man, and then she gun tell de story like de First Lady.
De man threatening to drink some of de same poison he does share out to de farmers.
Talk half. Lef half.